O Concello de Marín informa de que, finalmente, este verán non se celebrarán os campamentos de conciliación que ano tras ano o Goberno local ofrece para os nenos e nenas da vila. Así o declarou esta mañá a concelleira de Benestar Social, Marián Sanmartín, que entende que “é a mellor decisión que podemos tomar dadas as circunstancias, especialmente agora que xa sabemos que os nenos e nenas non volverán á escola este ano e que incluso se plantexa un escenario diferente do habitual para o inicio do curso en setembro”.
Esta oferta lúdica ten como obxectivo axudar ás familias da vila a conciliar o seu tempo cando a rapazada non ten colexio, organizando actividades de ocio no espazo urbano. Así a todo, o Concello considera que neste ano sería “moi complicado garantir todas as medidas que temos que cumprir estritamente a nivel de distancia física e hixiene constante, polo que é necesario previr posibles contaxios”.
